Тошкент шаҳридаги “Осиё” ресторанида мусобақа бошланди

Бугун 14 феврал куни Тошкент шаҳрининг учта ҳудудида Қуръон мусобақаси бўлиб ўтмоқда. Айни дамда “Муслимаат.уз” сайти жамоаси “Осиё” ресторанига мусобақа жараёнини ёритиш учун етиб келдилар.
Бизга маълум қилишларича, мазкур мусобақада Юнусобод, Яккасарой ва Мирзо Улуғбек туманларидан жами 32 та аёл-қиз иштирокчилар беллашишмоқда. Шундан иккитаси ҳифз йўналиши бўйича мусобақалашади.
Муборак беллашувни гўзал Қуръон тиловати ва салавоту нашидлар бошлаб берди.
Ундан сўнг Юнусобод бош имом-хатиби Раҳматуллоҳ қори Сайфуддинов сўзга чиқиб, ўз дил сўзлари билан ўртоқлашди ва иштирокчи аёл-қизларга муваффақият тилади. У киши шу йил ёз ойларида халқаро Қуръон фестивали фаравон юртимизда бўлишини хушхабар бердилар.
Кейин “Муслимаат.уз” аёл-қизлар сайти раҳбари, Шайх Муҳаммад Содиқ Муҳаммад Юсуф ҳазратларининг фарзанду аржумандлари Одинахон Муҳаммад Содиқ ҳам нутқ олди ва олим отасининг Қуръони Каримга бўлган муносабатлари ҳақида гапириб берди.  
Сўнг ҳифз йўналишидаги аёл-қиз беллашувчиларга навбат берилди.
Қизларнинг маҳоратини баҳолаш учун йиғилган ҳайъат аъзолари билан ҳам танишинг:
1.  Қурбонова Гулободхон
2.  Эргашева Мухлисахон
3.  Сайдаҳмедова Одинахон
4.  Бобоева Бибиробияхон
5.  Қодирова Муслимахон
6.  Муҳаммадлойиқ қори Абдулвоҳид ўғли
Барча иштирокчиларга Аллоҳ таолодан муваффақиятлар тилаган ҳолда хабарлар давомини биз билан кузатишингизни сўраб қоламиз.

Зуҳрахон ҲАМДАМОВА
“muslimaat.uz” учун махсус тайёрлади.